Danilo Werleman, C.E.O di Garage Cordia Aruba:
Garage Cordia tin 17 aña entregando autonan nobo na Polis
Mayoria auto di Polis na Aruba ta Toyota!
ORANJESTAD, Aruba – 2 di Juli 2017: Desde aña 2000 Garage Cordia ta lease autonan cu Cuerpo Policial Aruba y diabierna mainta nan tabata orguyoso di por a entrega un otro set di 3 auto nobo na Polis. Solamente cu e pickupnan aki no ta bay den un contract di “lease” sino Aruba Hospitality & Security Foundation a cumpra nan y a entrega nan na Cuerpo Policial Aruba.
“Di parti di Toyota nos ta masha orguyoso di por entrega 3 bunita ehemplar di Pickup Hilux”, asina e Chief Executive Officer di Garage Cordia Aruba, Danilo Werleman, a expresa. Aruba Hospitality & Security Foundation hunto cu Aruba Tourism Authority y AHATA tin varios plan basa riba un programa pa promove mas siguridad den nos industria turistico. A pidi Garage Cordia e aña aki pa entrega 5 auto nobo na Polis, di cual 3 ta e "Toyota Hilux Police Edition" y e 2 anterior tabata e Toyota RAV4.
Danilo Werleman a indica cu esaki ta parti di e pilot proyect, unda cu pa prome biaha den Caribe ta haci uzo di un auto hybrid como auto di polis. Asina aki nan lo tin un bon ehempel pa nota con e ta progresa y si e ta bon pa haci uzo, di cual ta mustra cu ta haci un diferencia hopi grandi den gastonan di combustibel pa Cuerpo Policial mes.
Aruba Hospitality & Security Foundation a haci entrega di e 3 autonan na Cuerpo Policial y CEO di AHATA, Jim Hepple a indica cu nan tin un bon relacion cu Polis. Ora cu a crea Aruba Hospitality & Security Foundation na aña 2001, e idea tabata pa yuda Polis obtene recursonan unda cu nan no por a haya. E fundacion a busca boto, autonan, bicicleta y waverunner pa Cuerpo Policial. E fundacion a busca e 3 autonan, pasobra Polis tabatin mester di nan na San Nicolas, Oranjestad y Noord.
Despues di percura pa mantene e patruyanan Toyota Prado activo y den uzo pa e ultimo 5 añanan, banda di Vannan Toyota Hiace pa Mobiele Eenheid, Toyota Corolla y Hilux pa Recherche, Toyota Land Cruiser como Overvalwagen, Toyota Land Cruiser Pick Up pa Polisnan Maritimo y Hilux pa Polisnan di Bario, Toyota Rav4 Hybrid, awor a añadi e 3 modelonan di "Toyota Hilux Police Edition" na e flota di auto di Polis. “Nos ta sigur cu Polisnan ta mobilisando den e miho autonan di mundo, cual tambe por conta cu un agencia dinamico y cu amplio experiencia di lease pa cu Cuerpo Policial. Nos ta y lo sigui brinda e miho sosten na Polis cu un servicio di casi 24 ora pa dia y 7 dia pa siman”, asina Danilo Werleman a termina bisando.
Garage Cordia Aruba ta yama Aruba Hospitality & Security Foundation, hunto cu AHATA, Aruba Tourism Authority, Gobierno di Aruba y Cuerpo Policial di Aruba, masha pabien cu e autonan Hilux nobo y masha danki pa e confiansa. Garage Cordia, casi celebrando 52 aña di existencia, siendo e agencia cu a bende mas auto den historia di nos isla y ta cumpli e aña aki 30 aña ta lease vehiculo na comercio y ta orguyoso di por tin un partner manera Cuerpo Policial Aruba tambe entre nan lista largo di clientenan satisfecho.
