Garage Cordia Aruba a lansa modelo "Qin" di BYD E prome modelo di e "2nd generation" di auto cu por core riba gasolin y/of coriente
E auto a sali core su so den "showroom"
ORANJESTAD, Aruba – 8 di juni 2014: Den cuadro di e celebracion di 50 aña di Garage Cordia, e compania ta sigui innova y percura pa productonan nobo, tecnologia moderno y duna clientenan un variacion di autonan moderno, eficiente y cu ta uza menos combustibel of den algun caso, no ta uza gasolin at all! Durante un evento den fin di siman, Garage Cordia Aruba orguyosamente a lansa su modelo nobo di BYD, esta e auto sedan "Qin" como e prome modelo pa drenta e mercado di Caribe. E ta e unico auto den su estilo riba nos isla anto na un prijs special!
"Tres aña pasa nos a yama bon bini na un marca nobo for di China, esta e BYD, Build Your Dreams. Cu e marca nobo aki, manera semper, Garage Cordia a percura pa nos mecaniconan por a sigui trainingnan special, nos a percura pa tin un stock grandi di piesa y cu nos por para tras di e garantia di e auto. Wel, orguyosamente nos por bisa awe cu BYD a sa di crece mas lihe di locual nos mes a pronostica", asina Danilo Werleman, gerente di operacion di Garage Cordia Aruba a bisa den su discurso.
Cu introduccion di BYD den e famia di Garage Cordia, a habri e opcion pa clientenan por tin mas variedad. Den Latino America pero na varios otro paisnan na mundo, ya BYD ta conkistando e mercado di autonan di coriente, specialmente den transporte publico, manera ta e caso di Taxi y Bus. Nos na Aruba mes a introduci un bus BYD di coriente cu Arubus a haci testnan cu a demostra di ta hopi eficiente y economico.
"Pero awor, nos por ta masha orguyoso na Aruba pa por menciona cu nos ta lansa awe un modelo nobo pa henter e region Caribense. Mi ta referi aki na e modelo Qin. Ta trata aki di e di dos generacion di modelonan di auto Plug-in-Hybrid Electric sedan", di acuerdo cu Danilo Werleman.
Aruba por ta orguyoso di por ta e prome pa lansa den henter e area di Caribe, e prome modelo di "2nd generation" di auto na Aruba cu ta "Dual-mode hybrid". Bisando esey, e doño di auto mes por scoge ki ora e ta core riba gasolin y ki ora riba coriente. Y no necesariamente un combinacion pasobra si e kier, e por core completamente riba coriente so tambe.
Alvin Thijsen, gerente di benta di Garage Cordia Aruba a enfatisa cu e modelo BYD Qin por core te cu 70 kilometer trankil riba un carga di coriente, mientras cu e "Hybrid" ta duna e chauffeur mucho mas opcion pa combina y ora di uza gasolin mes, uz’e na un forma masha eficiente. Na fin di aña pasa a cuminsa cu produccion di e modelo nobo aki na China y masha lihe el a sa di conkista e mercado. Na April di e aña aki a cuminsa bende den Latino America y desde luna di Mei el a yega Aruba!
E modelo "Qin" ta diseña pensando riba e autonan di siguiente generacion, den cual ta enfoca riba eficiencia dor di uzo di e "Dual-Mode Electric Powertrain". E bateria ta mas chikito pero mas eficiente pa mas uzo y pa brinda e auto mas energia. E interior di e auto ta na e nivel di calidad di e autonan mas caro den e segmento aki, pero na un prijs special. No solamente e ta bin cu asiento di cuero y stoelnan comodo, pero tambe e ta bin cu dos pantaya den e "dashboard" cu ta uza e tecnologia "i" den cual cu bo dede bo ta mishi y haya acceso na informacion of pa busca mas informacion.
Compara cu otro modelonan di auto cu normalmente tin camara patras pa ora di "reverse", e modelo Qin ta brinda bo camara tur rond di e auto, pues dilanti, den banda y patras. Tambe e ta bin cu un sistema di "remote control" di cual bo por maneha e auto cune pa un maximo di 2KM pa ora. Bisando esaki, bo por start e auto den bo cura di cas y trece na e porta mas cerca di Bo of kisas si bo ta den un parkeerplaats, lo bo por haci e mesun cos.
"Nos ta convenci cu na Aruba no tin ningun otro modelo di auto di ningun marca cu ta brinda tur e bentahanan aki", asina Alvin Thijsen a sigura. "Y sigur no na e prijs special cu BYD so por ofrece".
Garage Cordia Aruba ta spera di promove mas di e modelonan di BYD den e lunanan nos dilanti, debi na e bon reaccion di clientenan. Specialmente pasobra e calidad di e autonan ta bon, tin piesa den stock y e prijs ora di cumpra ta competitivo compara cu tur otro marca. Riba dje, BYD ta un di e poco marcanan di auto cu ta tanto enfoca riba uzo di energia limpi y menos uzo di combustibel tradicional. Cu esey doñonan di e modelonan Hybrid di BYD of e opcion di coriente ta gasta menos gasolin y como tal tin menos gasto di mantencion tambe!
